ព្រៃវែង៖ រដ្ឋមន្ត្រីក្រសួងមហាផ្ទៃ សម្ដេចក្រឡាហោម ស ខេង បានប្រកាសបើកចំហទទួលសំណើរ និងសំណូមពររបស់ប្រជាពលរដ្ឋដោយផ្ទាល់តាមរយៈគណនីហ្វេសប៊ុករបស់សម្ដេចដើម្បីបោសសម្អាតបញ្ហានានាក្នុងមូលដ្ឋាន។
ថ្លែងក្នុងពិធីបុណ្យបញ្ចុះខណ្ឌសីមាព្រះវិហារ និងឆ្លងសមិទ្ធផលនានា នៅវត្តមុនីរស្មីព្រៃត្បែង ស្ថិតនៅភូមិព្រៃត្បែង ឃុំត្របែក ស្រុកកំចាយមារ ខេត្តព្រៃវែង នាព្រឹកថ្ងៃទី១៩ ខែកុម្ភៈ ឆ្នាំ២០២៣ សម្តេចក្រឡាហោម ស ខេង បានស្នើដល់ប្រជាពលក្នុងមូលដ្ឋាននីមួយៗសហការផ្តល់ព័ត៌មានដល់ភូមិឃុំ អាជ្ញាធរ និងសមត្ថកិច្ចពាក់ព័ន្ធ ឬតាមគណនីហ្វេសប៊ុកសម្ដេចផ្ទាល់ក៏បានដើម្បីរាយការណ៍ និងលើកពីភាពអសកម្ម ឬបញ្ហាអវិជ្ជមាននានានៅតាមមូលដ្ឋាន។
លោកថា៖ «ខ្ញុំមានគណនីហ្វេសប៊ុកមួយបើកចំហ ដើម្បីទទួលយកមតិទាំងឡាយ យោបល់ទាំងឡាយ សំណូមពរ សំណើរទាំងឡាយរបស់ប្រជាពលរដ្ឋ»។
សម្តេចក្រឡាហោមបានឱ្យដឹងថា រយៈពេលមិនដល់ ២ឆ្នាំ ដែលសម្ដេចបានបង្កើតនិងប្រើប្រាស់បណ្តាញសង្គមនេះ សម្ដេចបានទទួលសំណើរ សំណូមពរ និងការចូលរួមជាយោបល់ប្រមាណ ២ ០០០ករណី សំណើរ សំណូមពរ ពីប្រជាពលរដ្ឋ ដែលសម្ដេចយល់ថាជាការល្អ និងឆាប់រហ័សក្នុងការបញ្ជូនសារដើម្បីឆាប់បានដោះស្រាយជូនដល់ប្រជាពលរដ្ឋ។
សម្ដេចរដ្ឋមន្ត្រីក្រសួងមហាផ្ទៃក៏បានបញ្ចាក់ថា គ្រប់មន្រ្តីទាំងអស់ត្រូវតែបើកចំហរដូចគ្នា ទទួលសំណើរសំណូមពរពីប្រជាពលរដ្ឋ ហើយត្រូវតែស្តាប់ហេតុផល និងធ្វើការដោះស្រាយជាចាំបាច់ ដើម្បីបោសសម្អាតបញ្ហាអវិជ្ចមាន និងមុខអសកម្មក្នុងមូលដ្ឋាន។
គួរឱ្យដឹងផងដែរថារដ្ឋមន្ត្រីក្រសួងមហាផ្ទៃសម្ដេចក្រឡាហោម ស ខេង មានហ្វេសបុកផេកផ្លូវការមួយរបស់សម្ដេចដែលមានឈ្មោះ Samdech Krolahom Sar Kheng, Cambodian Deputy Prime Minister ដែលត្រូវបានបង្កើតនៅខែមិថុនា ឆ្នាំ២០១៨៕